पूर्ण सार्की/ सुर्खेत। कर्णाली प्रदेशका १० जिल्लाबाट यस वर्षको माध्यमिक शिक्षा परीक्षा (एसईई) मा ३८ हजार ३७९ विद्यार्थी सहभागी हुने भएका छन्। भोलि बिहीबारदेखि सुरु हुने परीक्षाका लागि प्रदेशभर १६१ परीक्षा केन्द्र निर्धारण गरिएको छ।

शिक्षा विकास निर्देशनालय सुर्खेतका सूचना अधिकारी तथा परीक्षा शाखा प्रमुख खिमप्रसाद ढकालका अनुसार नियमिततर्फ ३२ हजार २५५ र ग्रेड वृद्धितर्फ ६ हजार १२४ विद्यार्थी परीक्षा दिनेछन्। यो संख्या गत वर्षको तुलनामा ४६१ ले बढी हो।

जिल्लागत विवरणअनुसार सबैभन्दा बढी विद्यार्थी सुर्खेतमा रहेका छन्। सुर्खेतका ३४ परीक्षा केन्द्रबाट नियमिततर्फ ७ हजार २९४ र ग्रेड वृद्धितर्फ २ हजार ४८५ गरी कुल ९ हजार ७७९ विद्यार्थी सहभागी हुनेछन्। यता सबैभन्दा कम विद्यार्थी डोल्पामा रहेका छन्, जहाँ ४ परीक्षा केन्द्रबाट नियमिततर्फ ६३४ र ग्रेड वृद्धितर्फ ४० गरी कुल ६७४ विद्यार्थी परीक्षामा सहभागी हुनेछन्।

त्यस्तै दैलेखका २२ परीक्षा केन्द्रबाट नियमित तर्फ ४ हजार २ सय ४७ र ग्रेडवृद्धि तर्फ २००६ गरी कुल ६ हजार २५३, जाजरकोटका १६ परीक्षा केन्द्रबाट नियमित तर्फ ४ हजार ६ सय ८ र ग्रेडवृद्धि तर्फ २०५ गरी कुल ४ हजार ८ सय १३, सल्यानका १९ परीक्षा केन्द्रबाट नियमित तर्फ ४ हजार ५६ र ग्रेडवृद्धि तर्फ ८६ गरी कुल ४ हजार १ सय ४२, रुकुमपश्चिमका १६ परीक्षा केन्द्रबाट नियमित तर्फ ३ हजार ७ सय ७७ र ग्रेडवृद्धि तर्फ १ सय ४५ गरी कुल ३ हजार ९ सय २२ जना , कालीकोटका २० परीक्षा केन्द्रबाट नियमित तर्फ ३ हजार ३८ र ग्रेडवृद्धि तर्फ ६ सय ७९ गरी कुल ३ हजार ७ सय १७ विद्यार्थी परीक्षामा सहभागी हुनेछन्।

त्यस्तै जुम्लाका १४ परीक्षा केन्द्रबाट नियमित तर्फ २ हजार १ सय ३३ र ग्रेडवृद्दि तर्फ १ सय २२ गरी कुल २ हजार २ सय ५५,

मुगुका ९ परीक्षा केन्द्रबाट नियमित तर्फ १ हजार ४ सय ७१ र ग्रेडवृद्धि तर्फ ५३ जना गरी १ हजार ५ सय २४ र हुम्लाका ७ परीक्षा केन्द्रबाट नियमित तर्फ ९ सय ९७ जना र ग्रेडवृद्धि तर्फ ३ सय ३ जना गरी कुल १ हजार ३०० विद्यार्थीले परीक्षा दिनेछन्।

गत वर्ष कर्णाली प्रदेशबाट ३७ हजार ९११ विद्यार्थी एसईईमा सहभागी भएका थिए। त्यसअघि २०७९ सालमा ३८ हजार ९७० र अघिल्लो वर्ष ३५ हजार ८०८ विद्यार्थीले परीक्षा दिएका थिए।

यस वर्ष विद्यार्थी संख्या केही बढेसँगै परीक्षा व्यवस्थापनलाई थप प्रभावकारी बनाउन सम्बन्धित निकायले तयारी तीव्र पारेका छन्।